Kandidati i pavarur për kryetar të Skenderajt, Bekim Jashari, ka treguar se garës për të parin e komunës nuk i hyri për inate të askujt, por për ta ndërtuar këtë vend ashtu siç e deshën babai i tij, Hamëz Jashari dhe axha i tij, komandanti Adem Jashari dhe gjithë dëshmorët e tjerë.
Ai e quan vendimin me të vështirë për të dhe familjen e tij, jo për faktin se cilat sfida e presin, por duke pasur parasysh prej cilës familje vjen dhe a do të mund ta çoj deri në fund mandatin me nder dhe faqe të bardhë.
Por, tani kur ka nisur fushatën Jashari thotë se po e sheh entuziazmin e qytetarëve të Skenderajt për kandidimin e tij, fakt ky që po i jep atij vullnet dhe të drejtë në vendimin e tij.
“Nuk ka qenë e lehtë aspak, përkundrazi ka qenë një nga vendimet me të vështira për mua dhe familjen time shpirtërisht dhe psiqikisht, jo nga ajo frika e përgjegjësive apo sfidave që na presin përpara, po nga ajo ndjenja duke e ditur kush je, i kujt je, anëtar i cilës familje je, a do të mund t’ia dalësh deri në fund të mandatit me nderë dhe faqe të bardhë. Kjo ka qene ajo vështirësia e vendimmarrjes, por nevoja është parë, jo që nuk është punuar në këtë vend, është punuar shumë, me të mirat dhe të metat e veta. Kështu që unë besoj që edhe ata që e kanë kërkuar kanë pas të drejtë por besoj që duke i parë qytetarët që kam dalë në teren deri tash këto ditë, dëshira dhe vullneti i tyre, entuziazmi i tyre me kandidaturën time me jep vullnet që kam pasur të drejt edhe vet që kam marr vendimin e duhur”, ka thënë Jashari për “Kosova Press”.
Oferta për të hyrë si kandidat në garën për kryetar të Skenderajt, Bekim Jashari thotë se pati që në vitin 2007, por nuk ka qenë në interesin e tyre që familja Jashari të marrë ngjyra politike, sepse konsiderojnë se janë të të gjithëve pa dallime partiake. Prandaj, kërkesës së qytetarëve iu ka përgjigjur vetëm si kandidat i pavarur që t’i hyjë garës për kreun e Skenderajt.
Kandidatura e djalit të Hamëz Jasharit, u pa si goditje për PDK-në, meqë po kandidonte në bastionin e kësaj partie, mirëpo Bekim Jashari thekson se kandidimi i tij erdhi vetëm si kërkesë e qytetarëve, e jo kundër dikujt.
Madje, thotë se ka pasur kërkesë edhe nga PDK-ja, për të qenë kandidat i tyre qysh në vitin 2007, por edhe për këto zgjedhje, por që nuk e ka pranuar. /tesheshi.com/
