Gati prangat për një ish-deputetin socialist që para një jave ka lënë mandatin.
Pas arrestimit të Tom Doshit, Mark Frrokut dhe Armando Prengës, edhe një tjetër ish-përfaqësues i mazhorancës mund të përballet me akuza nga ana e Prokurorisë së Përgjithshme.
“Fshehje pasurie dhe pastrim parash”, mund të jenë dy akuzat që Inspektorati i Lartë i Deklarimit dhe Kontrollit të Pasurive dhe Konfliktit të Interesave, ka paraqitur si padi për ish-deputetin, Arben Ndoka.
“Në përfundim të kontrollit të plotë, rezultuan fshehje të pasurive, deklarime të rreme të interesave private dhe mungesë burimesh të ligjshme financiare në shumën rreth 1.5 milion euro dhe për rrjedhojë subjekti Arben Ndoka është kallëzuar penalisht”, thuhet në deklaratën e ILDKP-së.
Ky institucion sqaron se, Ndoka ka refuzuar kërkesën e bërë prej tij për të dhënë shpjegime e dorëzuar dokumentacionin justifikues lidhur me burimin e pasurisë së tij, duke mos u paraqitur.
Në fund, ILDKPKI i kërkon organit të Prokurorisë një hetim të plotë e të gjithanshëm për të zbuluar nëse ndodhemi edhe para veprave të tjera penale, duke mbajtur parasysh faktin që kemi të bëjmë me një person të dënuar jashtë vendit për vepra të tjera penale e që pasuria e tij, e pajustifikuar me burime të ligjshme, mund të jetë rezultat edhe i këtyre aktiviteteve.
/tesheshi.com/
