Jelena Ostapenko, një letoneze 20-vjeçare, e 47-ta në renditjen botërore të tenisteve, e pamësuar të fitojë turne të mëdha, ka shkaktuar këtë të dielë një prej befasive më të mëdha të turneut French Open, Grand Slam-it të dytë të vitit.
Ajo ka mundur në finale të klasifikuarën të tretën në nisje të turneut, rumunen Simona Halep, ndërkohë që vetë ka qenë e paklasifikuar!
Ostapenko bëhet e para letoneze që fiton një Grand Slam, dhe është e para teniste e paklasifikuar që e fiton turneun prej vitit 1933.
Pos kësaj, vetë loja e saj ka qenë një befasi më vete, me një përmbysje 360-gradëshe. Ostapenko kishte humbur setin e parë 6-4, e po kështu humbiste 3-0 në setin e dytë. Për të shpërthyer më pas, për ta fituar setin e dytë 6-4, e atë finalin 6-3.
Gjithçka e bërë vetë nga Ostapenko, nga gabimet e shumta te goditjet e jashtëzakonshme të topit në qoshet e fushës, gjer te fitorja 2-1.
Kundërshtarja e saj, Simona Halep, do të ishte bërë numri një në botë nëse do ta kishte fituar këtë finale, por nuk ia doli, edhe pse ishte shumë pranë suksesit.
Dëshpërimi për rumunen bëhet më i madh, pasi për të është finalja e dytë e humbur në Roland Garros, pas asaj të 2014-s. /tesheshi.com/
