BE jep 2.1 miliardë euro për rajonin, përjashton tre vende

Komisioni Evropian miratoi një paketë financiare me vlerë 2.1 miliardë euro për Ballkanin Perëndimor, por Mali i Zi, Kosova dhe entiteti Republika Srpska në Bosnje u lanë jashtë kësaj ndihme.

Ndonëse arsyet e anulimit të kësaj ndihme nuk janë deklaruar drejtpërdrejt, Brukseli më herët njoftoi se Kosova do të vuajë sanksione për shkak të krizës së pazgjidhur në veri, dhe RS për shkak të politikës secesioniste të liderit të saj Milorad Dodik.

Ndërsa sipas mediave malazeze, Mali i Zi nuk ka marrë mbështetje financiare nga Komisioni Evropian për shkak se qeveria  e atyshme ka paraqitur projekte të papërshtatshme dhe të parakohshme.

Paketa e miratuar më 30 qershor përfshin 2.1 miliardë euro të destinuara për realizimin e 14 projekteve infrastrukturore të vendeve të Ballkanit Perëndimor, nga të cilat 528 milionë euro janë grante të BE-së.

Është paketa e pestë e investimeve në kuadër të Planit Ekonomik dhe Investiv të BE-së për Ballkanin Perëndimor dhe Komisioneri Evropian për Fqinjësinë dhe Zgjerimin Oliver Varhely theksoi se cikli i ri i investimeve është një mesazh i qartë për vendet e rajonit se e ardhmja e tyre është në BE. /tesheshi.com/