Vendet e Bashkimit Evropian do të kërkojnë të paraqesin një front të bashkuar kundër tarifave të presidentit amerikan Donald Trump në ditët në vijim, duke miratuar ndoshta grupin e parë të kundërmasave të synuara për deri në 28 miliardë dollarë të importeve amerikane.
Kundërmasat do të mbulonin importet e mallrave nga filli dentar te diamante dhe një veprim i tillë do të nënkuptonte se BE-ja do t’i bashkohej Kinës dhe Kanadasë në hakmarrjen kundër SHBA-së për vendosjen e tarifave, sipas Reuters.
Lëvizje të tilla mund të çojnë në një përshkallëzim në një luftë të vërtetë tregtare globale, duke rritur çmimin e mallrave për miliarda konsumatorë dhe duke i shtyrë ekonomitë në mbarë botën në recesion.
Më shumë se 50 vende ftuan Shtëpinë e Bardhë për negociata
“Bashkimi Evropian është i gatshëm të mbrojë interesat e tij me kundërmasa proporcionale ndaj tarifave të vendosura nga presidenti amerikan Donald Trump”, tha presidentja e Komisionit Evropian Ursula von der Leyen pas një bisede telefonike me kryeministrin britanik Keir Starmer. Ajo bëri të ditur se BE-ja do të bashkëpunojë me partnerët e saj për të arritur këtë qëllim.
Tarifat bazë prej 10 për qind për të gjitha importet në SHBA hynë në fuqi të shtunën.
Më shumë se 50 vende i kanë bërë thirrje Shtëpisë së Bardhë që të fillojë bisedimet tregtare mbi tarifat e importit të vendosura së fundmi nga Presidenti i SHBA Donald Trump, tha Kevin Hassett, drejtor i Këshillit Ekonomik Kombëtar të SHBA. /tesheshi.com/
