Bayern Mynih ka një plan të qartë dhe sekret: Synon të marrë trajnerin Joachim Low për sezonin tjetër. Sekretin e ka nxjerrë pikërisht prestigjozia “Bild”, e cila shkruan se pas refuzimit këmbëngulës të trajnerit aktual Jupp Heyckens, për të vijuar në krye të skuadrës bavareze, drejtuesit e klubit kanë nisur kontaktet me trajnerin e përfaqësueses së Gjermanisë.
Joachim Low drejton tashmë prej shumë vjetësh Kombëtaren e vendit të tij, me të cilën u shpall edhe kampion Bote në vitin 2014, e së fundmi nuk e ka fshehur dëshirën për të drejtuar një klub europian. Edhe pse kontrata e tij përfundon në vitin 2020, ai ka lënë të kuptohet se në përfundim të Botërorit të Rusisë vitin e ardhshëm, ai do të largohet nga përfaqësuesja e “Panzerave”.
Këtë detaj e kanë kapur fort drejtuesit e Bayern, të cilët kanë hapur krahët për të mirëpritur një trajner si Low, i cili gëzon edhe simpatinë e mirënjohjen e të gjithë Gjermanisë. Përveç kësaj, Low do të punonte në mënyrë krejt komode me lojtarët e Bayern, pasi pjesën më të madhe të tyre i njeh fare mirë, pasi i stërvit prej shumë vitesh në Kombëtare. /tesheshi.com/
