“Karlo Ançeloti do të shkojë si trajner në Kinë dhe marrëveshja është që të largohet nga Bajern i Mynihut, që në muajin janar, kur në Azi fillon sezoni i ri”.
Ky është lajmi “bombë” që ka rënë në ambjentet e klubit të Bajern Mynih. Ai që e ka nxjerrë si lajm, ka qenë pikërisht një ish-bavarez, Mario Basler. Ashtu siç ka qenë lojtar që nuk pyeste shumë për opinionin, Basler e ka bërë deklaratën gjatë një talk-show ku merrte pjesë, në kanalin televiziv Sport 1.
Basler theksoi se ky lajm nuk është 100 përqind i sigurtë, por burimi i tij që ia ka konfiduar, është shumë i besueshëm, por do mbahet sekret. Kaq ka mjaftuar që mediat në Gjermani të japin deduksione për formën e dobët që po kalon Bajern, apo për blerjet e pakta që u realizuan.
Edhe Basler ka qenë kritik në këtë drejtim, duke “marrë në mbrojtje” Tomas Mylerin, i cili nuk është më i preferuar i Ançelotit, e duke shprehur dëshirën që blerja e Hames Rodrigues, të verifikohet, nëse është apo jo e përshtatshme për bavarezët.
Edhe pse ka fituar 1 titull dhe 2 Superkupa, Karlo Ançeloti ka presionin për të fituar më shumë me Bajernin, pasi Champions League, ishte dhe qëllimi kryesor për të cilin u afrua në Bavari. Por humbja e kryesimit në kampionat, e mbi të gjitha, loja e dobët që po shfaq skuadra, e kanë vënë në shënjestër italianin, i cili po pret “rrufe nga të katër anët”. /tesheshi.com/
