Kryetari i partisë Demokratike. Lulzim Basha ka vizituar Berlinin, por si u shpreh edhe vetë në një intervistë për DW, kjo nuk ka lidhje me situatën e ndezur politike në Tiranë, por për takime me partinë simotër gjermane. CDU-në.
Partia Demokratike, sipas Bashës, po bashkëpunon ngushtësisht me kristiandemokratët gjermanë dhe me fondacionin Konrad Adenauer për hartimin e alternativës së saj para votuesve shqiptarë, programin qeverisës të demokratëve për zgjedhjet e ardhshme parlamentare.
PD duket se po merr eksperiencë jo vetëm për anën përmbajtësore të programit, por edhe për organizimin dhe riorganizimin e partisë.
Duke kaluar në tema më aktuale si ajo e hetimit ndërkombëtar për skandalin e CEZ, Lulzim Basha u shpreh se PD do t’i shkojë deri në fund qëndrimit të saj.
I pyetur në lidhje me akuzat që rëndojnë edhe mbi eksponentët të PD-së për këtë skandal, Basha theksoi se janë akuza që vijnë nga kampi Rama kur janë mbaruar argumentet e mbrojtjes.
“Tani që akuza të rënda rëndojnë mbi Edi Ramën për humbjen, abuzimin, vjedhjen, shpërdorimin e 500 milionë eurove të shqiptarëve, ai kujtohet të bëjë akuza kundër atyre që po i ngrenë këto çështje jo për interesin e tyre politik, por për interesin publik të shqiptarëve. Ne nuk kemi asnjë rezervim ndaj subjektit të hetimit”, tha Basha.
Ai është treguar I hapur të shpjegojë edhe spekulimin e medias për një takim të fshehtë me Ramën dhe bashkëpunimin mes tyre në dëm të LSI-së dhe Ilir Metës.
“Nuk ka asnjë takim sekret të Lulzim Bashës me asnjë nga bashkëpërgjesit e gjendjes ku është katandisur vendi, familjet, të cilat kanë marrë rrugën e eksodit si asnjëherë më parë në këto 20 vite. Por ka një përballje të fuqishme të Lulzim Bashës, Partisë Demokratike dhe opozitës me shkaktarët e kësaj gjendjeje, me Edi Ramën dhe Ilir Metën, me politikat e tyre të gabuara, me politikën e lakut në fyt, të kërbaçit për qytetarët e të korrupsionit e megaaferave për qeveritarët, me politikën e ndëshkimit të berberëve, por të lartësimit të ministrave të lidhur me narkotrafikun, siç është Ministri i Brendshëm. Në këto kushte është jo vetëm qesharake, por edhe e papranueshme, e refuzueshme, unë e refuzoj me përbuzje çdo insinuatë për pakte me ta”, tha Basha. /tesheshi.com/
