Kryeopozitari Lulzim Basha sqaroi mosbindjen civile që nis sipas tij, me zgjedhjet e Kavajës dhe përshkallëzohet ku apeloi qytetarët që pas 18 qershorit, të mos u binden më ligjeve të shtetit të republikës së vjetër, të mos paguajnë taksat, e të mos i binden Kushtetutës.
Edhe pse kryeministri Rama shprehu bindjen se opozita do të hyjë në zgjedhjet e 18 qershorit, duket se Basha, të paktën deri tani, nuk lë të kuptohet se kjo gjë do të ndodhë. Madje, ai tha sot nga çadra në bulevard se “nëse republika e vjetër nuk tërhiqet nga plani dhe projekti për të asgjesuar pluralizimin, për ta zëvendësuar atë me pluralizmin fasadë dhe për të vazhduar demokracinë fasadë, nëse kjo nuk ndodh në 18 qershor në mesnatë, Kushtetuta dhe ligjet e republikës së vjetër, për republikën e re do të jenë të pavlefshme, nul”.
Basha tha se goditjen përfundimtare kryeministri Rama do ta marrë në 7 maj në Kavajë. “Qindra mijë shqiptarë të ndershëm, që do të bashkohen në Kavajë me datën 7 maj, në një bashkim gjigand dhe të paparë ne 27 vite pluralizëm, se bashku me mijëra banorë të Kavajës dhe në ballë me rininë e Kavajës, do të pamundësojnë zgjedhjet farsë, votimin farsë të diktuar nga krimi”, paralajmëroi ai. /tesheshi.com/
