Lulzim Basha, pas dështimit të negociatave të qeverisë me opozitën, deklaroi se javën e ardhshme do të nisin protestat e opozitës në të gjithë vendin.
Duke folur në çadër, Basha tha se fajtori i dështimit të negociatatve ishte Rama pasi nuk pranoi qeverinë teknike dhe ka deklaruar se do të nisë mosbindja civile.
“Javën e ardhshme nis përshkallëzimi i mosbindjes civile anë e mbanë Shqipërisë, për t’i treguar Edi Ramës se koha kur në vend bëheshin votime dhe jo zgjedhje, ka marrë fund.
Përpjekja e negociatorëve nuk pati sukses, pasi Rama refuzon qeverinë teknike. Qeveria teknike është zgjidhja e vetme për të zbatuar ligjin e dekriminalizimit. Nuk mund të pranohet që njeriu që e ktheu Shqipërinë në Kolumbinë e Europës do të jetë përgjigja për problemet. Ndaj, kushti i patjetërsueshëm për zgjedhje të lira e të ndershme mbetet qeveria teknike”, tha Basha.
Për vettingun kreu i PD-së, shtoi se partia e tij “angazhohet solemnisht para shqiptarëve që me një qeveri teknike të zbatohet ligji për dekriminalizmin, të luftohet droga dhe të nisë zbatimi pa vonesë i vetting-ut, sipas marrëveshjes politike të 21 korrikut”. /tesheshi.com/
