Pasi bojkotoi zgjedhjet lokale me kushtin e panegociueshëm për ikjen e Ramës, kreu demokrat Basha tha se PD do i fitonte nëse ato zhvilloheshin nesër.
“Të gjitha të dhënat tregojnë se sot opozita e bashkuar është shumicë qeverisëse edhe sikur zgjedhjet e lira e te ndershme të mbahen nesër”, deklaroi ai nga Librazhdi.
Duke e vizatuar negativisht gjendjen ekonomike, Basha tha se synimi i një qeverisjeje të mundshme prej tij do ishte përmirësimi urgjent i klimës ekonomike, heqja e taksës mbi karburantin 300 lekë për litër, ulja e çmimit e energjisë elektrike, si dhe vendosja e vetëm 1 takse duke dhënë subvencione për fermerët.
“Detyra jonë është t’i bëjmë të ditura këto propozime të planit tonë ekonomik, që shumica referendare ‘Rama ik’ të 30 qershorit ta kthejmë nga maxhorancë refuzuese të regjimit në një shumicë për ndryshim të vërtetë, që do të funksionojë për të gjithë, që ta prekin e gëzojnë të gjithë”, theksoi Basha. /tesheshi.com/
