Kreu i opozitës Lulzim Basha ka deklaruar së fundi se PD-ja do të bëjë koalicion vetëm me popullin. Kjo, për të shuar dilemat nëse partia e tij e synon një aleancë me LSI-në, si një prej mënyrave për të riardhur në pushtet. Gjatë takimit në Lezhë me strukturat e PD-së, ai e ka quajtur madje si parti të kalbur LSI-në. Por duke u kthyer pak në kohë, duhet kujtuar fakti se PD-ja arriti të qeveris dhe me një tjetër mandat 4-vjeçar falë aleancës me LSI-në, që poashtu, falë kësaj aleance, Basha është dhe kryetar i Bashkisë së kryeqytetit. Nga ana tjetër, teza populiste e “aleancës me popullin”, është hedhur në “treg” fillimisht nga Edi Rama në opozitë, në atë kohë kur as që flitej për t`u afruar me Ilir Metën, për shkak të një acarimi të tejskajshëm mes tyre. Por koha e solli që të ishte pikëërisht aleanca me LSI-në sesa ajo me “popullin”, që e solli në pushtet PS-në. Madje ka zëra që thonë se është pikërisht kjo lloj aleance e jo ajo me popullin, që po koston rëndë në cilësinë e qeverisjes së majtë. Nuk e dijmë se sa do i qëndrojë Basha këtij populizmi të huazuar nga Rama-opozitar, por PD-ja që ai drejton sot, ka një përgjegjësi historike në politikën shqiptare, që duke zgjedhur të bëjë aleancë me LSI-në në qershor të 2009, e faktorizoi aq shumë partinë e Metës (të cilësuar poashtu dhe nga Berisha si mollë e kalbur, një vit para se ta ftojë për bashkëqeverisje), sa tashmë prej tij varet të qënit në pushtet ose në opozitë. Sfidë historike e Bashës në politikën shqiptare, do qe zvëndësimi i faktorit ‘LSI’ me faktorin ‘popull’, si për të shlyer një gabim të rëndë, me brengën e së cilës iku nga kjo botë dhe Olldashi. Por, a mundet t`ja arrijë?! /tesheshi.com/
© 2021 TESHESHI.COM - Portal mbarëkombëtar. Të gjitha të drejtat e rezervuara.