Kreu i PD-së, Basha ka gjetur një formë jo pak të njohur, si reagim ndaj letrës së pazakontë të eurokomisionerit Johanes Hahn, ku gati qartazi goditej opozita për formën e zgjedhur të aksionit të saj politik me bojkot, e madje paralajmërohej për dhunën eventuale të së shtunës më 13 shkurt, kur ajo ka thirrur një protestë.
Basha e ka sfiduar diplomatin e Brukselit, që duhet thënë se përfaqson zërin e BE-së, duke iu përgjigjur me një narrativë pro-europiane, por në tjetër kahje, në tjetër formë, me tjetër mesazh.
“Miqtë tanë anë e mban botës, duhet ta dinë fare mirë se rruga evropiane nuk mund të kalojë nga bojkoti, nuk mund të kalojë e nuk do të kalojë nga mospjesëmarrja, por kurrsesi nuk do të kalojë nga asgjësimi i garës së vërtetë, nuk do të kalojë nga kthimi i monizmit pas 27 vitesh që e shporrëm. Nuk mundet dhe nuk do të kalojë nga votime farsë të diktuara nga krimi dhe droga.
Rruga evropiane e Shqipërisë do të kalojë nga autostrada referendare e 13 majit për zgjedhje të lira dhe të ndershme. Ndaj bashkohuni me mua, familjen time, me fëmijët e mi do të jemi këtu. Ejani me zemrat e mbushura me besim tek e nesërmja që na pret. Unë e kam parë këtë të nesërme, ju po e ndërtoni ditë për ditë.
Bashkë do të shembim çdo pengesë. Bashkë do të nxjerrim në pension kupolën e korruptuar të Republikës së Vjetër do t’ia dorëzojmë Muzeut Kombëtar në pavionin e turpit. Ejani pa frikë. Ky do të jetë manifestimi gjigant. Askush të mos mungojë në këtë moment të historisë, në këtë moment të Evropës që do të vijë e shpalosur me vlerat e saj”, është shprehur Basha. /tesheshi.com/
