Arben Ristani, ish-nr, 2 i PD-së, ka kthyer pllakën në lidhje me dosjen e lobimit me para ruse nga ana e Bashës, për të cilën dhe ai është thirrur në Prokurori, pasi për kohën kur dyshohet se ka ndodhur, ai ka qenë Sekretari i Përgjithshëm i selisë blu.
Tashmë që është kundërshtar i kreut demokrat, ai tha se çështja e lobimit rus është një pikë të errët për Bashën.
Ristani tregoi se prokurori i vuri para provat, ku ishte deklarata e lobistit amerikan dhe deklarata publike e Bashës që kur bashkoheshin, sipas tij, të linin të kuptoje se janë përdorur para pa burime të pastra për lobimin.
Ristani tha se prokuroria e mbylli këtë çështje në mënyrë të çuditshme.
“Një nga çështjet që është e rëndë dhe e bërë publike është çështja e lobit rus ku përfshihen edhe dyshime për fonde të ardhura nga banka ruse.
Unë di ato që prokuroria më ka vënë në dispozicion, di që ka patur një deklarim të lobistit amerikan i cili ka deklaruar në institucione financiare në SHBA që ka marrë 650 mijë dollarë nga të cilat 150 nëpërmes një shoqërie skoceze, shoqëri guaskë që financohej me fonde të dyshuara nga banka ruse dhe 500 mijë të tjera që kishin vajtur tek ai pa burim.
Sipas prokurorisë, Basha kishte deklaruar publikisht 500 janë kontribut i shqiptarëve të Amerikës.
Në atë moment, prokuroria këtë deklarim të lobistit nuk e kishte të kthyer ne provë dhe në mënyrë të çuditshme e mbylli çështjen…”, tha Ristani. /tesheshi.com/
