Kryetari i PD-së, Lulzim Basha, e ka cilësuar si boshe dhe demagogjike programin e paraqitur nga Edi Rama në Kuvend. Madje Basha bëri një krahasim mes asaj që ndodhi në seancë dhe mbledhjeve të Byrosë Politike në kohën e diktaturës.
Duke folur për mediat, në përfundim të seancës së paradites, ku kryeministri paraqiti një përmbledhje të programit qeverisës, Basha tha se Rama nuk guxoi të thoshte asnjë fjalë për premtimet e pambajtura gjatë mandatit të parë, siç ishte ai më zhgënjyesi, për hapjen e 300 mijë vende të reja pune.
“Paraqitja më boshe, më sipërfaqësore ku thelbi ishte eliminuar dhe zëvendësuar nga demagogjia. Për një brez më të vjetër ishte një reminishencë që mbahej kur Kuvendin e qeveriste Byroja Politike.
Kjo është e pafalshme për çdo kryeministër, edhe për Ramën. Shqiptarët nuk kanë pritshmëri tek qeveria e tij. Sot ai që flet aty ka çelësat e qeverisjes së vendit. Refuzoi të thoshte një fjalë të vetme për 300 mijë vende pune që premtoi 4 vjet më parë, çoi shqiptarët në emigracion dhe tha se kjo është pjesë e lirisë së lëvizjes.
Sot “Rama 2”, refuzon të mbajë përgjegjësi për “Rama 1”. Rama 1 bën sikur nuk e njeh Rama 2, por është i njëjti person. E gjitha është një shfaqje e shëmtuar, produkt i aleancës së Ramës me krimin.
Të vetmit në parlament që nuk u shitën dhe nuk u shantazhuan janë deputetët e Partisë Demokratike”, u shpreh Basha. /tesheshi.com/
