Kreu i Partisë Demokratike, Lulzim Bahsa ka qenë i pranishëm në një takim elektoral në Vaun e Dejës, nga ku ka deklaruar se dyshja Rama-Meta nuk kanë asnjë ofertë për qytetarët dhe i ka konsideruar ata si një aksident që duhet dhe do ti lëmë pas me votën e 21 qershorit.
“Dyshja Rama-Meta nuk ka ofertë në këto zgjedhje e as këta të tjerët që kanë dalë këtu si hije. Ata janë një aksident në rrugën e fatit tonë që duhet ta lëmë pas me votë. Oferta e tyre është kërcënimi, janë skemat e manipulimit dhe blerjes së votës. I kam paralajmëruar se nuk do të njohim asnjë rezultat që nuk del nga vullneti i lirë i shqiptarëve. Kemi vendosur tolerancë zero ndaj manipulimit dhe blerjes së votës, tolerancë zero ndaj blerësve të tyre”,- tha Basha.
Ai siguroi qytetarët se oferta e PD dhe opozitës është ligji i qytetarëve që do ta vënë në jetë që këtë vjeshtë. Sipas Bashës, kjo është oferta e frymëmarrjes, e rimëkëmbjes, e pikënisjes për një të ardhme me të mirë.
“Vetëm kandidatët tanë në mbarë vendin kanë ofertë reale për punë, në bazë të lehtësive për sipërmarrjen. Kjo është diferenca e madhe që këtu në Vaun e Dejës është 5 fish më e madhe ndaj konkurrentit tonë”,- deklaroi kreu i opozitës.
Ai u bëri thirrje qytetarëve të ngrihen me votë, të fitojnë me votë. “Kjo është thirrja e fushatës sonë, për punë, dinjitet, rimëkëmbje, zhvillim. Me votë për një të ardhme të re”,- përfundoi Basha fjalën e tij në Vaun e Dejës.
