Lulzim Basha u ka kërkuar krerëve të Partive Popullore Europiane, që të ndikojnë tek zyrtarët e lartë të BE-së për të sjellë në Tiranë një mision vëzhgimi për “t’i shpëtuar nga oligarkët në pushtet”. Siç bën të ditur zyra e shtypit të PD-së, Basha tha në fjalën e tij në samitin e PPE-së në Spanjë se “Kapja e shtetit nga krimi i organizuar dhe oligarkët e lidhur me pushtetarët, përqëndrimi i pushtetit dhe pasurive publike në pak duar kanë sjellë një situatë të rëndë ekonomike në Shqipëri, pasiguri dhe krizë ekonomike”.
“Kjo situatë e bën edhe më të domosdoshëm fokusimin e vëmendjes së Bashkimit Europian në Shqipëri, ku si rezultat i bashkëqeverisjes me krimin dhunohen standardet demokratike e shteti ligjor dhe qytetarët goditën padrejtësisht”, shtoi kreu i demokratëve.
Në këto takime, Basha ka shprehur shqetësimin e opozitës për mungesën e vullnetit nga ana e mazhorancës për respektimin e marrëveshjes së dekriminalizimit, e nënshkruar një vit më parë edhe me ndërmjetësimin e Parlamentit Europian.
Basha u ka kërkuar bashkëbiseduesve të sjellin në Shqipëri përfaqësuesit e tyre për të parë nga afër situatën sesi mazhoranca sfidon themelet e demokracisë shtetin ligjor, liritë dhe të drejtat e njeriut. /tesheshi.com/
