Partia Demokratike kërkon rrëzimin e draftit aktual për Arsimin e lartë, i cili nuk u arrit të votohet të enjten e shkuar.
Kryetari i Partisë Demokratike, Lulzim Basha ka drejtuar tryezën për arsimin e lartë, duke hedhur akuza ndaj reformës së qeverisë.
Basha deklaroi se “procesi për reformën në arsimin e lartë nisi me transparencë, por shumë shpejt u kthye në një labirinth. Ky ligj i jep një goditje fatale aspiratave për arsimim. Sipas kësaj skeme, universitetet publike barazohen me ato private”, ka deklaruar Basha.
Kreu i PD-së, theksoi se, shqiptarët sot kërkojnë që arsimi i lartë të jetë i përballueshëm, ndërkohë që qindra të rinj kanë braktisur studimet sipas tij, sepse nuk përballojnë dot tarifat.
“Synimi ynë është që arsimi i lartë të jetë i aksesueshëm nga sa më shumë të rinj”, ka deklaruar Basha.
“Kjo reformë do të ketë një impakt negativ tek qindra e mijëra familje shqiptare dhe tek brezat e rinj. Të luftojmë që të rrisim cilësinë në arsimin e lartë”, ka shtuar kreu i PD.
