Kryetari i Partisë Demokratike Lulzim Basha e cilëson shkatërrues ndërtimin e 3 inceneratorëve në Fier, Tiranë dhe Elbasan, ndërkohë që sipas tij, pronarët e vërtetë që fshihen pas kësaj çështjeje janë Edi Rama dhe Arben Ahmetaj, të cilët i kanë dhënë 4.8 milion euro ndërtuesit ende pa filluar punë.
“Edhe pse ligji është ndaluar nga zbatimi për shkak të bashkimit të qytetarëve dhe opozitës prapë Edi Rama po ecën me strategjinë shkatërruese që është strategjia e inceneratorëve”, thotë Basha.
Kreu i partisë Demokratike shprehet se inceneratorët jo vetëm ndotin ajrin dhe prodhojnë mbetje të rezikshme, por nuk ndihmojnë as industrinë e riciklimit.
“Këto para në vend të shkojnë për shkolla e spitale po shkojnë për të ndotur mjedisin. Kjo është një aferë mafioze, prokuroria të nisë hetimin dhe të vërë pikat mbi i, për ata që grabisin fondet, kjo është një aferë e përmasave kriminale dhe është faqja tjetër e medaljes së kanabizimit të Shqipërisë”, thotë Basha.
Ai shtoi se ditët e ardhshme, ekspertët do të bëjnë publike dokumentet dhe akuzat që opozita ka dy vjet që i denoncon për këtë afire, që Basha e cilëson të tmerrshme dhe kriminale. /tesheshi.com/
