Kreu demokrat Basha apeloi që të ndihmohen zona si Kavaja e Vora, duke i konsideruar si jashtë interesimit qeveritar në raport me dëmet që kanë pësuar nga tërmeti. E megjithatë, Basha ka zgjedhur të mos bëjë politikë, pa përmendur qeverinë, e aq më pak të përcjellë ndonjë akuzë për të.
“Kavaja dhe Vora kanë pësuar dëmtime serioze nga tërmeti i 26 nëntorit. Qytetarët kanë nevojë për ndihmë urgjente, pasi kalojnë natën nëpër makina dhe çadra të cilat edhe për shkak të kushteve atmosferike janë të papërshtatshme.
Në Vorë banesat e qindra familjeve janë të dëmtuara dhe të pabanueshme. Shumë prej tyre kanë nevojë për ndihma dhe për ushqime.
Në Kavajë me dhjetëra objekte janë të pabanueshme. Prej katër ditësh po presin ekspertet të vlerësojnë gjendjen e objekteve të banimit, ndërsa netët i kalojnë nëpër makina, pa mundur të marrin as rrobat e trupit nga frika se pallatet mund të shemben.
Kërkohet urgjentisht vëmendje për këto zona me dëmtime të rënda, banorët e të cilave kanë nevojë për strehë, ushqime dhe vlerësim të banesave”, shkruan kreu demokrat. /tesheshi.com/
