Në 25-vjetorin e ardhjes së PD-së në pushtet me votë plebishtitare, duke mundur komunistët e katër dekadave diktaturë, kreu aktual Lulzim Basha ka përcjellë një mesazh në FB, duke e lidhur atë ditë me të sotmen.
“22 marsi 1992 është dita kur u mposht me të vërtetë pushteti i diktaturës, i dhunës, i sigurimit, i shtypjes dhe kontrollit të njerëzve dhe lirive të tyre. Atë ditë në Shqipëri triumfoi liria, demokracia dhe njerëzit.
22 marsi është dita kur filloi çlirimi dhe hapja e vërtetë e Shqipërisë nga izolimi, diktati dhe kontrolli i diktaturës komuniste. 22 marsi eshte frymëzim dhe besim për Lëvizjen tonë popullore për Republike të Re me zgjedhje të lira dhe të ndershme”, shkruan Basha.
Ndërkohë, vetë ky i fundit nuk njihej në atë kohë për protagonizëm, qoftë dhe parapolitik. Për Bashën është thënë vetëm se ai ka qenë një komisioner i PD-së. Basha del në skenë vetëm në vitin 2005 si një ndër emrat e KOP-it, duke ngjitur më pas shkallët e pushtetit si eksponent i PD-së me disa poste të rëndësishme ministrore. /tesheshi.com/
