Ky është titulli i vënë nga sportivja spanjolle Marca për shkatërrimin e Getafes dje nga Barcelona. Një dominim i jashtëzakonshëm i katalanasve në këtë fazë të sezonit, i shoqëruar me fitore të thella, e pa asnjë shenjë se makineria vrasëse do të ndalet.
Barcelona fiton 7-0 më 3 shkurt ndaj Valencias, në një takim të vlefshëm për Kupën e Mbretit. Më 14 shkurt dërrmon Selta Vigon në kampionat, duke fituar me një rezultat tenistik, 6-1. Më 3 mars pason fitorja 1-5 në transfertë ndaj Rajo Valekanos. Tre ditë më vonë e pëson Eibari, po ashtu në fushën e vet. 0-4 për Barcelonën në një takim që i ngjan më tepër një stërvitoreje. Për të ardhur te mbrëmja e kësaj të shtune, ku i vjen radha Getafes të provojë mbi kurriz pamëshirshmërinë e katalanasve.
6-0 në 90 minuta, me lojtarët e Getafes që mezi prisnin të dëgjonin rënien e bilbilit të fundit. Një lojë e tëra në sulm për të zotët e shtëpisë, që me Nejmarin të rikthyer kanë një marsh më tepër.
Presioni ka dhënë efekt që në minutat e para, ndërsa Juan Rodriguez shënon në portën e vet. Më tutje kemi shiun e golave, me këta protagonistë, Munir, Nejmar, Messi, Nejmar dhe Arda Turan.
Argjentinasi Messi i lejon vetes të humbasë edhe një penallti, duke vënë në pah rishtas të vetmen sëmundje të kësaj skuadre në këtë sezon: humbjen e gjysmës së 11-metërshave të goditur.
Barcelona nuk njeh rivalë, me 75 pikë në krye të La Ligës, me 84 gola të shënuar në 29 javë, e me vetëm 22 të pësuar. Radhën e ka Arsenali, që do gjendet në “Camp Nou” të mërkurën, në kuadër të Champions League-s. /tesheshi.com/
