Përfaqësues të “Demokracisë në Veprim” kanë raportuar për disa parregullsi në komunën e Mitrovicës dhe atë të Podujevës që i kanë evidentuar gjatë ditës së sotme kur po zhvillohet raundi i dytë i zgjedhjeve për kryetarë komunash.
Sipas tyre, deri tani kanë hasur në 7 raste të pranisë së personave të paautorizuar në vendvotime në komunën e Mitrovicës, ndërsa në tetë raste tjera ka munguar materiali zgjedhor.
Ndërkohë, në Komunën e Podujevës, vëzhguesit e DnV-së kanë raportuar për tre raste të pranisë së materialit propagandues të subjekteve politike brenda diametrit prej 100m të qendrës së Votimit. Kjo dukuri, sipas DnV-së, është e sanksionuar me nenin 85 të Ligjit për Zgjedhjet e Përgjithshme (LZP).
DnV iu bën thirrje të gjithë komisionerëve, vëzhguesve të partive politike dhe të gjithë pjesëmarrësve të tjerë në procesin zgjedhor të jenë të përkushtuar për të përmbushur obligimet e tyre për të garantuar zgjedhje të lira dhe të ndershme. DnV iu rikujton se çdo shkelje gjatë ditës së votimit, procesit të numërimit dhe në përgjithësi gjatë tërë procesit zgjedhor është i dënueshëm deri në 5 vite burgim. /tesheshi.com/
