Sulmuesit e përfaqësueses së Shqipërisë po kalojnë një periudhë pozitive, duke shënuar në portat kundërshtare në kampionatet e huaja ku ata militojnë.
Goli i së shtunës i Armando Sadikut, ka gjetur si përgjigje të dielën dy gola që mbajnë po firma shqiptarësh.
Kështu, fillimisht ka qenë Bekim Balaj që ka shënuar në takimin mes Terek Groznit dhe Rostovit në kampionatin rus. Kujtojmë se Rostovi fitoi thellë, 4-1, ndaj Ajaksit vetëm pak ditë më parë, duke e nxjerrë jashtë Champions League-s.
Balaj ka shfrytëzuar një krosim brenda zonës, duke e tundur rrjetën e Rostovit pas gjuajtjes së saktë me kokë. Ky ishte goli i barazimit për Terek Groznin, që do të kalonte në epërsi pas dy minutash, kur do të realizonte Angel. Terek Grozni do të fitonte 2-1.
Ky ishte goli i dytë i Balajt që prej transferimit të tij në futbollin rus. Sulmuesi i përfaqësueses kuqezi shënoi dhe para një jave, në fitoren 1-3 të ekipit të tij ndaj Ufas.
Golat e Balajt e kanë ndihmuar Terek Groznin të mbajë vendin e tretë në renditjen e Premier League-s ruse pas pesë javësh.
Në mbrëmjen e së dielës ka ardhur dhe goli i parë i Rey Manajt në Serinë A italiane.
I huazuar nga Interi te Peskara, sulmuesi 19-vjeçar nga Lushnja nuk ka pritur gjatë për t’i treguar cilësitë e tij.
Ai do të futej në lojë në minutën e 74-t në takimin Sasuolo – Peskara, duke zëvendësuar një tjetër shqiptar, Ledian Memushajn.
Goli do të vinte në minutën e 81-të, kur Manaj do të ndiqte mirë një top të ardhur nga e majta e sulmit, për ta dërguar atë në rrjetë. Por ai do të humbiste një tjetër mundësi pak çaste më vonë, kur do të gabonte në kontrollin e topi gjatë një kundërsulmi.
Ndeshja u fitua 2-1 nga Sasuolo, por rëndësi ka fakti që Manaj ka nisur të shënojë në kampionatin italian. /tesheshi.com/
