Kosova është kryefjalë në Strasburg gjatë kësaj të martë, ku raporti i hartuar nga deputetja greke Dora Bakojanis për anëtarësimin e Kosovës në Këshillin e Europës pritet të votohet në Asamblenë Parlamentare të këtij organizmi.
Bakojanis, tha se, asnjë gur nuk ka mbetur pa u lëkundur në përgatitjen e raportit dhe se është konfirmuar se pavarësisht disa mangësive, Kosova është demokraci funksionale. Duke bërë thirrje për Kosovën si anëtare e Këshillit të Evropës, ajo ka thënë se juristët kanë konfirmuar qëndrimin se vendi i përmbush kërkesat bazike për t’iu bashkuar këtij organizmi.
Bakojanis shpjegoi se raporti nuk prek çështjen e njohjes apo mosnjohjes së Kosovës dhe se kjo duhet të mbetet kompetencë e shteteve. Deputetja greke ka përmendur hapat që ka bërë Kosova për t’i përmbushur kushtet, përfshirë edhe zbatimin e vendimit të Gjykatës Kushtetuese për pronësinë e Kishës Ortodokse serbe në Deçan. Këtë e ka quajtur si “problemin më të madh në zbatimin e ligjit në Kosovë që ka pritur nga viti 2016”.
Duke folur për themelimin e Asociacionit të komunave me shumicë serbe në Kosovë, ajo ka thënë se këtë e ka konsideruar si çështje krejtësisht në kompetenca të brendshme të Kosovës. Bakojanis u kërkoi shteteve mosnjohëse të lejojnë mbrojtjen e dy milionë kosovareve “nën çadrën” e BE-së. /tesheshi.com/
