Dy makina-bombë kanë shpërthyer mbrëmë pak para mesnatës pranë dy hoteleve luksoze në qendër të kryeqytetit të Irakut, duke lënë më e pakta dhjetë të vdekur, e tridhjetë të plagosur. Shpërthimet, në dukje të koordinuara, patën si objektiv hotelet Cristal Grand Ishtar (ish-Sheratoni) dhe Babylon.
Makina e parë bombë shpërtheu pranë hotelit Babylon, të rinovuar së fundi, e pak minuta më pas u dëgjua dhe shpërthimi tjetër në zonën pranën hotelit Ishtar. Ky i fundit ka një klub të njohur, i cili është i mbushur të enjten në mbrëmje.
Të dy hotelet janë të njohur për klientelën e tyre të huaj, më së shumti gazetarë e drejtues të organizatave qeveritare e joqeveritare, e janë thuajse plot në këtë kohë.
Forcat e sigurisë gjetën dhe një tjetër makinë-bombë në parkingun e hotelit Babylon, të cilën e çaktivizuan më pas.
Një ndalimqarkullimi gjatë natës, në fuqi prej një dekade, u hoq më herët këtë vit nga qeveria irakiane, në një përpjekje për të ofruar një ndjesi normaliteti, por që atëherë shpërthimet janë bërë më të shpeshta në Bagdad.
Dy hotelet janë goditur dhe pesë vite të shkuara, në janar të 2010-s, dhe në ato incidente vdiqën 36 persona. Përgjegjësinë për sulmet nuk e ka marrë ende askush. /tesheshi.com/
