Nga Mensur Krasniqi
Dalngadalë po zgjerohet formati i partive politike në takimet me përfaqësuesit ndërkombëtarë për zgjidhjen e krizës politike në Maqedoni, gjegjësisht në bllokun e partive politike shqiptare. Ndonëse nuk ishte paralajmëruar një takim i tillë, papritmas i dërguari special i Gjermanisë, Johan Hajndëll në kuadër të vizitës dy ditore në Maqedoni, me qëllim të gjetjes së zgjidhjes për dalje nga kriza politike, përveç partive më të mëdha në pushtet dhe opozitë, ka realizuar takim të përbashkët edhe me krerët e opozitës shqiptare jashtëparlamentare.
Pas këtij takimi kreu i Lëvizjes BESA, Bilall Kasami ka deklaruar se takimi me të dërguarin gjerman ishte mjaft i frytshëm ku opozita shqiptare jashtëparlamentare i parashtroi mekanizmat me të cilat Maqedonia do t’i rikthehej normalitetit, duke shtuar se ata edhe në të ardhmen presin që të marrin pjesë në mënyrë aktive në bisedime me përfaqësues të komunitetit ndërkombëtar për të dhënë kontributin e tyre që Maqedoninë edhe definitivisht ta nxjerrin nga kjo krizë politike që disa vite me rradhë e kanë futur partneri në koalicion VMRO-BDI.
“Ne si Lëvizja BESA para gati një viti ofruam platformën për dalje nga kriza, Ridefinimi, e cila në masë të madhe jep një ofertë për atë se si Maqedonia duhet të rikthehet në normalitet. I parashtruam këto çështje të cilat janë pjesë e platformës për dalje nga kriza Ridefinimi, dhe presim që në të ardhmen partitë opozitare të jenë pjesë aktive e ofertave të cilat do ti japin për dalje nga kjo krizë e rëndë në të cilët na kanë futur partitë aktuale të Qeverisë Maqedoninë”, ka deklaruar kryetari i Lëvizjes BESA, Bilall Kasami.
Nga ana tjetër, kryetari i LR-PDSH-së, Zijadin Sela, tha se disa nga kërkesat në këtë tryezë bisedimi ishin pjesëmarrja e përfaqësuesve të partive opozitare jashtëparlamentare në Komisionin Shtetëror Zgjedhor, komisionet komunale si dhe te vendvotimet, me qëllim të mos lënies së hapësirës për manipulime zgjedhore.
“Ishte një takim me frymë shumë konstruktiv me të deleguarin special nga Ministri i Punëve të jashtme të Gjermanisë, dhe është një hap shumë i mirë drejt kthimit të institucioneve në vend, nga vet shkaku që në këtë proces kyçet edhe ajo që quhet opozitë e vërtetë. Fatkeqësisht, zhvillimet në dhjetëvjeçarin e fundit kanë bërë që shqiptarët në Maqedoni, t’ju mungojë opozita e vërtetë. Kjo opozitë është lajm i mirë që po konsolidohet, lajm i mirë është që opozita shqiptare e realtë po bëhet faktor vendosës në tryezë të bisedimeve në lidhje me krizën politike e cila është krijuar në vend.“, ka deklaruar kreu i LR-PDSH-së, Ziadin Sela.
Ndërsa Zylfi Adili, nënkryetar dhë përfaqësues i UNITETI-t në këtë takim, ka thënë se Lëvizja BESA, LR-PDSH dhe UNITETI janë opozita reale shqiptare, dhe si e tillë këto kanë bërë hapin e parë në futjen e bisedimeve me faktorin ndërkombëtar.
“Zotëri Hajndël ishte personi i cili takoi krerët e opozitës reale shqiptare në Maqedoni. Ishte një takim i frytshëm. Bisedimet dhe idetë që i paraqitëm rreth daljes nga kjo krizë në të cilën na futën tre partitë në Maqedoni që janë nënshkrues të Marrëveshjes së Përzhinos”, ka deklaruar nënkryetari i UNITETI-i, Zylfi Adili.
Homologu gjerman, Johan Hajndëll gjatë ditës së djeshme kishte realizuar takime edhe me kryetarin e shtetit Gjorgje Ivanov, kryeparlamentarin Trajko Veljanovski dhe me liderët e VMRO-DPMNE-së dhe LSDM-së, Nikolla Gruevski dhe Zoran Zaev.
Si dje ashtu edhe sot, Hajndëll nuk u paraqit para mediave, por në njoftimin e ambasadës gjermane ka përshëndetur vendimin për shtyerjen e zgjedhjeve, vendim ky, siç thuhet në njoftim “ do të jep mundësi partive të përmirësojnë ngjarjet shqetësuese të muajit të kaluar dhe të kthejnë vendin në rrugën euroatlantike”.
Po ashtu, Berlini kërkon që sa më shpejt që është e mundur të tërhiqet vendimi i presidentit Ivanov për amnisti ndaj politikanëve të inkriminuar të pushtetit. /tesheshi.com/
