Se sa (nuk)respektohen liritë dhe të drejtat e njeriut në Maqedoni, më së miri flet raporti i Avokatit të Popullit për vitin 2015. Sipas po këtij, në Maqedoni kemi shkelje drastike të drejtave kushtetuese të njeriut.
Kreu i këtij institucioni, Ixhet Memeti, në shpalosje të raportit në një konferencë për media potencoi pikat kryesore të raportit, nga i cili theks të veçantë i është kushtuar ndjekjeve të paligjshme të komunikimeve, brutalitetit policorë, krizës me refugjatët, obligimit të paligjshëm të qytetarëve me taksën radiodifuzive dhe punës së penguar të institucionit të Avokatit të Popullit.
Ndërsa gjatë vitit 2015 sipas Memetit është pranuar numri më i madh i ankesave nga qytetarët.
“Gjatë vitit raportues u pranuan numër më i madh i ankesave nga qytetarët prej se ekziston ky Institucion. Vepruam ndaj 5.336 rasteve nga të cilat vetëm në periudhën raportuese u pranuan 4.403 parashtresa, ndërsa u realizuan rreth 8.500 biseda me qytetarë dhe të huaj për probleme të ndryshme me të cilat ballafaqohen dhe të njëjtëve u është ofruar këshillë juridike”, ka deklaruar Avokati i Popullit, Ixhet Memeti.
Përveç tjerash, në këtë raport flitet edhe për gjendjen shqetësuese sa i përket mbrojtjes shëndetësore të personave të privuar nga liria, dobësia në jurisprudencë dhe sistemi gjyqësor jo efikas.
Bazuar në raport, edhe çështja e përfaqësimit të drejtë dhe adekuat ka shënuar ngecje, ku shqiptarët, nga 18.6 për qind sa ishin të përfaqësuar në vitin 2014, në vitin 2015 janë vetëm 18.8 për qind.
Sipas Ixhet Memetit, këtë përqindje e ka rritur punësimi i administratës jo adekuate dhe fiktive kryesisht në Sekretariatin për implementimin e Marrëveshjes së Ohrid, punësim ky i cili sipas Memetit partizon administratën dhe ulë kualitetin e punës saj. M. Krasniqi – /tesheshi.com/
