E përditshmja turke Daily Sabah, një simotër e së mirënjohurës Sabah, por në gjuhën angleze, ka njohur diskriminimin pikërisht nga ata që nuk rreshtin ditë e natë të flasin për lirinë e shtypit e për një Turqi të kthyer në varrmihëse të fjalës së lirë.
Një vendim i Parlamentit Europian e ndalon shpërndarjen e kësaj gazete në ambientet e tij; një vendim i marrë nga presidenti Antonio Tajani me kërkesë të ligjvënësit holandez Jeroen Lenaers.
Vendimi është në vazhdën e një furie antiturke në hapësirën europiane, përcjellë me vendime që shpërfaqin hapur më së paku hipokrizinë e ligjërimit dhe qëndrimit mbizotërues, në dukje parimor.
T’i mbyllësh gojën një gazete, që për më tepër ka një qasje të moderuar, ndërsa nuk rresht së kërkuari liri shtypi në Turqi e nxjerrje nga qelia të spiunëve të veshur me petk gazetari, kjo është shumë më shumë se një thjesht paturpësi!
I ashpër ka qenë reagimi i ministrit turk të Drejtësisë, Bekir Bozdağ, i cili fillimisht shprehet: “E ftoj PE-në të respektojë lirinë e shtypit, dhe shpresoj që ndalimi të hiqet, ndryshe emri i presidentit të PE-së do të kujtohet si ai i një njeriu që nënshkroi një vendim fashist.”
I njëjti zyrtar i qeverisë turke përcjell këtë qëndrim në një varg reagimesh në një prej rrjeteve sociale: “Ky vendim i padrejtë i presidentit të Parlamentit Europian dhe zbatimi i tij fashist është masakër mbi lirinë e shtypit dhe të shprehjes, është shkatërrim i vlerave të BE-së.”
“Në Europë, liria e shtypit dhe e shprehjes ekziston vetëm për ata që shpifin ndaj Turqisë, por kritikët e Europës dhe të europianëve nuk kanë liri shprehjeje. Ky është një standard i dyfishtë!”
Vendimi tregon, thotë Bekir Bozdağ, fytyrën e shëmtuar të Parlamentit Europian. “Unë e dënoj këtë fytyrë të shëmtuar!”
Presidenti turk, Recep Tayyip Erdoğan, premtoi sjellje me të njëjtën monedhë nëse ndalimi i gazetës shkon më tej, ndërkohë që vendimi u quajt nga Drejtoria e Përgjithshme e Shtypit dhe Informacionit në Turqi si një njollë e zezë në historinë e shtypit.
Zëvendëkryeministri turk, Numan Kurtulmuş, do ta cilësonte vendimin si të papranueshëm. /tesheshi.com/
