Avokatët e të akuzuarve në rastin “Monstra” i kanë dërguar një letër liderit të LSDM-së Zoran Zaev në të cilën kërkojnë që ky i fundit t’ua dorëzoëj inçizimet dhe transkriptet që kanë të bëjnë me rastin ose, të njejtat t’i dorëzojë në Prokurorinë e Lartë dhe në Apel, përderisa ata janë duke pritur shqyrtimin e ankesës e cila u ricaktua për 11 shtator.
Në letër, avokatët i referohen deklaratës së Zaevit dhënë gazetës gjermane “Die Zeit” në të cilën u shpreh se; “njerëz të pafajshëm qëndrojnë në burg”, e cila deklaratë më vonë u mohua nga vetë Zaev, duke thënë se ajo është keqinterpretuar.
Publikimin e materialeve për rastin “Monstra” ka disa muaj që e paralajmëron vet lideri opozitar, por siç thotë vonesa në publikim ka të bëjë me frikën se shpalosja e bisedave të përgjuara mund të nxisë tensione ndëretnike.
Avokati Skender Raufi lidhur me këtë thotë se e kupton vendimin politik të Zaevit kur kalkulon me publikimin, por nuk sheh pengesë që provat të dorëzohen tek institucionet: ”Nuk mendoj se bëhët fjalë për taktizim eventual të tij, sepse edhe vet ka thënë se ekziston mundësia që provat t’i dorëzojë në prokurori shkaku i natyrës senzitive të materialeve. Unë jam dakord që të dorëzohën në prokurori” deklaroi Raufi.
Përveç të akuzuarve për vrasje, publikimin e audio-inçizimeve me padurim e presin edhe familjet e të vrarëve, të cilët të hënën publikisht kërkuan nga Zaev që t’i publikojë ato, ndërkohë në internet qarkullon dhe sms porosia të cilën Zaev ja ka dërguar prindit të njërit nga fëmijët e vrarë në të cilën ka premtuar se do të publikojë materialet.
/tesheshi.com/
