Qenë nisur për në një bazë ushtarake në Siri, por përfunduan në fund të Detit të Zi. 92 persona humbën dje jetën teksa avioni i tyre, një Tupolev TU-154, u rrëzua pak minuta pasi qe ngritur rishtas në ajër. Pjesa më e madhe e viktimave i përkisnin korit të ushtrisë ruse, Ansamblit Aleksandrov.
Ky ishte vetëm rasti i fundit i një vargu incidentesh me avionin TU-154, një pjesë e të cilëve u përkasin viteve ’90 të shekullit të shkuar.
Një aksident me këtë lloj avioni ka ndodhur në gusht të vitit 1996, mbi ishullin norvegjez të Spitzbergenit, e që pati 141 viktima. Në korrik të vitit 2001 shënohet një tjetër aksident me 145 të vdekur, në qytetin siberian të Irkutskit.
Në gusht të 2006-s, Tupolevi i kompanisë ajrore ruse Pulkovo rrëzohet në Ukrainë pasi përpiqet të fluturojë mbi një stuhi. Bilanci qe tragjik: 170 të vdekur.
Tre vite më vonë, në korrik të 2009-s, në veri të Iranit rrëzohet një TU-154 që i përkiste një kompanie vendase, Caspian Airlines. Një aksident nga i cili vdiqën të 168 personat që fluturonin me të.
I njëjti tip avioni i merr jetën më 10 prill të 2010-s presidentit polak Lech Kaczynski. Ai dhe zyrtarë të tjerë të lartë polakë vdesin nga rrëzimi i avionit pranë qytetit rus të Smolenskut.
Në ditën e parë të 2011-s, më 1 janar, një TU-154B merr flakë në pistë, përpara se të ngrihet, në një aeroport në Rusi. Nga incidenti pati tre të vdekur e 30 të plagosur.
Nuk mbaron me kaq. Një vit më pas, në shkurt të 2012-s, 117 persona humbën jetën pasi një avion i ngjashëm u rrëzua në një fluturim brenda Iranit, në jugperëndim të vendit.
Dy persona humbën jetën më 4 dhjetor të 2014-s, kur një TU-154 u nda më dysh pas daljes nga pista në aeroportin Domodedovo të Moskës.
TU-154 nuk përdoret më nga kompanitë ajrore civile ruse, ama është ende në përdorim nga forcat ushtarake.
I ngjashëm në madhësi dhe në funksionim me një Boeing 737, ky Tupolev fluturoi për herë të parë në vitin 1972, e doli nga prodhimi në 1994-n. Ai mund të mbajë nga 155 në 180 pasagjerë, me një shpejtësi fluturimi prej 850 kilometrash në orë.
Ministri rus i Tregtisë dhe Industrisë, Denis Manturov, u deklaroi një ditë më parë agjencive të lajmeve se tërheqja e përhershme nga fluturimi e të gjithë avionëve TU-154 do të qe e parakohshme, e kjo pavarësisht tragjedisë më të fundit që shkaktoi ky mjet fluturues. /tresheshi.com/
