Një avion luftarak i forcave qeveritare siriane ka rënë në një treg në Eriha, në provincën veriperëndimore të Idlibit, të mbajtur nga kundërshtarët e regjimit, duke lënë 35 të vdekur dhe 120 të plagosur.
Lajmi është konfirmuar nga një zyrtar lokal i mbrojtjes civile, ndërsa ushtria siriane nuk ka reaguar ende.
Të dhënat e para flasin për një defekt të avionit, por nuk dihet ende nëse ai u qëllua më pas. Pjesa më e madhe e të vdekurve ishin civilë.
Eriha, një kohë një fortesë e forcave të Esadit, ra në maj në duart e luftëtarëve të opozitës dhe të militantëve të ISIS-it. Qyteti gjendet në provincën e Idlibit, ku trupat qeveritare janë në zmbrapsje që në mars, duke humbur dhe kryeqendrën e provincës, të quajtur po ashtu Idlib.
Qyteti po bombardohej nga forcat ajrore të Esadit në kohën që ndodhi rënia e avionit. Përplasja i ktheu në gërmadha një numër ndërtesash, edhe ashtu të shkatërruara nga luftimet.
Ekipet e mbrojtjes civile të qytetit kanë bërë të mundur nxjerrjen e viktimave dhe të plagosurve prej gërmadhave. /tesheshi.com/
