Avionët turq kanë nisur një valë sulmesh ajrore ndaj bazave të rebelëve kurdë në veri të Irakut, pas një sulmi vdekjeprurës mbi ushtrinë turke, në juglindje të vendit, një ditë më parë.
Me dhjetëra avionë u përfshinë në bombardimin që zgjati gjashtë orë, agimin e së martës, raporton agjencia turke e lajmeve Anadolu.
Kryeministri turk, Ahmet Davutoglu u zotua “të spastrojë” bastionet e rebelëve në përgjigje të sulmit të së dielës nga militantët e PKK-së gjatë të cilit humbën jetën 16 ushtarë turq.
Davutoglu u kundërpërgjigj ndaj sulmit të PKK-së duke u thënë gazetarëve se Turqia nuk do të dekurajohet në luftën e saj “kundër terrorit”.
“Ato male do të spastrohen nga terroristët. Do të bëjmë atë që duhet”, tha ai.
Edhe presidenti Recep Tayyip Erdogan, gjithashtu, premtoi një përgjigje të vendosur.
Sipas agjencisë Anadolu, në sulmet e mëngjesit të ushtrisë turke, u vranë 35 rebelë kurdë.
Këto sulme ajrore janë masa më e fundit në valën e fundit të dhunës mes ushtrisë turke dhe PKK-së që kur armëpushimi mes tyre dështoi, në muajin korrik.
Më shumë se 40 mijë njerëz kanë humbur jetën që nga nisja e fushatës së armatosur të partisë së kurdëve në vitin 1984, në mbështetje të një shteti të pavarur kurd brenda Turqisë. /tesheshi.com/
