Shqipëria dhe Kosova pritet të shpallen vende të “sigurta” nga ana e Gjermanisë në mënyrë që të mos ketë më alibi për rritjen e azilkërkuesve në këtë vend, të cilët po rriten me përmasa gjithnjë e më të mëdha.
Krerët e qeverive të landeve gjermane i kanë kërkuar qeverisë qebdrore që të vendosë dhe rregulla kufizimi për lëvizjen, siç mund të jetë rikthimi i vizave.
Bosnja, Maqedonia dhe Serbia janë deklaruar si vende të sigurta në muajin dhjetor, dhe radha i ka ardhur Shqipërisë, Kosovsës dhe Malit të Zi.
Qeveria federale pritet të shpallë dhe këto tre vende si shtete që nuk paraqesin rrezikshmëri.
Sipas zyrës gjermane të emigracionit, numrat e azilkërkuesve nga Shqipëria, Kosova dhe Mali i Zi, janë rritur në krahasim me vitin e shkuar me 515%. Por një klasifikim i “sigurt” i këtyre shteteve, e bën më të lehtë që autoritetet gjermane t’i dërgojnë sërish mbrapsht nëpër vendet e origjinës azilkërkuesit.
Në të kundërt, nëse këto vende do të shpallen si të rrezikshëm, atëherë do të jetë më e vështirë që të provohet nëse aplikantët janë vërtetë viktima të persekutimit mbi baza politike, fetare ose etnike.
Për të parandaluar valën e këtyre emigrantëve të paligjshëm, një tjetër masë që mendohet të merret nga vendet e BE-së është rivendosja e vizave. Megjithatë pjesa më e madhe e vendeve të Bashkimit Europian, përfshirë Gjermaninë, janë pjesë e “Shengenit”, çka lejon lëvizjen e pakufizuar. Por një ndryshim i këtyre rregullave do të kërkonte një vendimmarrje të re me votim në instancat më të larta të BE-së.
Nëpër kampet ku strehohen azilkërkues janë raportuar raste të shumta dhune.
Në Mainstockheim, Bavari, 20 refugjatë u evakuuan nga një hotel, pas përleshjeve me një grup vendasish. Ndërsa në Gjermani lëvizja ekstremiste “Pegida” protestoi me 2000 aktivistët e saj kundër pranimit të azilkërkuesve.
Si rrjedhojë e kësaj situate të përshkallëzuar, samiti rajonal i Gjermanisë pasoi takimin e ministrave të Brendshëm europianë në Bruksel, një javë më parë, ku secilit vend duhej të hartonte një listë me shtete nga të cilat nuk do të pranonte asnjë aplikim për azil.
