Bregu verilindor i Australisë është përballur me erëra të fuqishme dhe shira të rrëmbyeshëm, që kanë shkaktuar dëme e kanë lënë pa energji mijëra shtëpi.
Cikloni “Debbie”, një stuhi e kategorisë së katërt, ka goditur me erëra me shpejtësi gjer në 263 kilometra në orë.
Raportohet për çati të fluturuara, për pemë të rrëzuara, e për një të lënduar seriozisht nga rënia e një muri, ndërsa është e vështirë që të ketë një vlerësim të dëmeve për shkak të problemeve në komunikim.
Policia e Queensland-it paralajmëroi dhe për mundësitë e viktimave nga cikloni.
Autoritetet i patën nxitur më herët qytetarët që të largohen nga shtëpitë e tyre, çka mund të ishte evakuimi më i madh në Australi që prej vitit të largët 1974, kur një tjetër ciklon, “Tracy”, pati shkatërruar qytetin Darwin në veri të vendit.
Kryeministri i Australisë, Malcolm Turnbull, i raportoi parlamentit për aktivizimin e një plani reagimi ndaj katastrofës natyrore, pasojat tërësore të së cilës do të duhet ende kohë të mësohen plotësisht. /tesheshi.com/
