Asgjë nuk ka ndryshuar te Reali i Madridit. Ka qenë veç një iluzion shndërrimi i Realit nën drejtimin e francezit Zinedine Zidane.
Rafa Benitez apo Zinedine Zidane në stol? Nuk ka aspak rëndësi! I njëjti ekip, e njëjta paraqitje sa herë që ish-galaktikëve u duhet të luajnë me skuadra të nivelit mesatar apo më tepër.
Reali humbi në fushën e tij këtë pasdite ndaj Atletikos, në derbin e Madridit, pas një 90 minutëshi për t’u harruar. Një Ronaldo i shpërfytyruar, një Benzema që nuk dihet se ç’bën në fushë, një James Rodriguez që nuk ngjan fare me atë të vitit të shkuar, një mesfushë pa pikë ideje, e, në fund, një trajner që nuk di të bëjë lëvizjen e duhur për ta ndryshuar lojën. Thellësisht të ndjeshme mungesat e dy lojtarëve kyç, uellsianit Gareth Bale e brazilianit Marcelo, pa të cilët skuadra humbet ritmin e nuk di të orientohet.
Në anën tjetër, shkëlqen në derbin e Madridit një Atletiko tmerrësisht e organizuar, tmerrësisht e qartë taktikisht, që di të godasë atëherë kur duhet.
Me fitoren 0-1 për Atletikon përfundoi ky takim, të përcjellë nga pakënaqësia e tifozerisë në shkallët e stadiumit, sa për rezultatin, aq edhe për lojën e shëmtuar të Realit.
I ngushtë rezultati, por e thellë diferenca mes dy skuadrave. Vërtet Reali pati zotërimin e topit në pjesën më të madhe të lojës, por treguesit e tjerë flasin për një Atletiko mjaft kërkuese.
Goli i vetëm i ndeshjes u shënua për miqtë nga Griezmann në minutën e 53-të, por lojtarët e Atletikos mund t’i kishin thelluar shifrat nëse do të ishin treguar më të saktë para portës. Meritë ka dhe portieri Navas i Realit, që në një numër rastesh u tregua i saktë në ndërhyrjet e tij.
Në fund, tre pikë të çmuara për Atletikon e Madridit, që çimenton pozitat në vendin e dytë. Ndërsa te Reali duhet të mësohen me faktin se këtë vit thuajse i kanë thënë lamtumirë mundësisë për ta fituar kampionatin. Vetëm një pikë në dy javë për skuadrën e Zizusë, që tanimë duhet të mendojë dhe për Vilarealin që afrohet nga pas, duke i rrezikuar dhe vendin e tretë. /tesheshi.com/
