Tension, ritëm, raste të shumta, 11-metërsha, gola… Gjithçka ka pasur gjysmëfinalja e dytë mes Bajernit të Mynihut dhe Atletikos së Madridit.
Në një “Allianz Arena” të tejmbushur, ashtu edhe siç pritej, në prani të 70.000 tifozëve, futbolli sulmues i bavarezëve është përballur me stilin mbrojtës të madrilenëve. Dhe fituese në fund ka qenë filozofia e Diego Simeone-s, që një dorë lojtarësh të zakonshëm futbolli i ka kthyer në luftëtarë të vërtetë në fushë, të pandalur për asnjë çast.
Bajerni do ta niste vrullshëm takimin, në kërkim të përmbysjes së rezultatit të ndeshjes së parë, të humbur 1-0. Bavarezët do ta gjenin golin në minutën e 31-të, pas një goditje nga jashtë zonës së Alonso-s e të devijuar nga lojtarët e Atletikos.
Pika e kthesës do të ishte tre minuta më pas, kur Oblak pret mjeshtërisht një 11-metërsh të gjuajtur nga Müller.
Simeone fut Carrasco-n në pjesën e dytë, një ndërrim që ndryshon lojën për miqtë. Në të 53-tën minutë, Torres mahnit me pasimin inteligjent për Griezmann-in, që shënon. 1-1!
Loja pati momente të mira për Atletikon, por pikërisht atëherë kujtohet të godasë përsëri Bajerni. Lewandowski ka ngjallur shpresat edhe një herë me golin e tij. Pasojnë minuta emocionuese, me një furtunë bavareze. Oblak bëhet i pakapërcyeshëm në portën e Atletikos.
Gjashtë minuta para fundit, Torres ka mundësi të mbyllë gjithçka teksa fiton një 11-metërsh. Të cilin e humb po vetë. Neuer bën të njëjtën pritje si Oblak në pjesën e parë, në të njëjtin krah, në të njëjtën mënyrë.
Pesë minutat shtesë nuk ndryshojnë asgjë, edhe pse mundësitë nuk munguan. Bajerni fiton 2-1, por eliminohet.
Atletiko do të pësonte mbrëmë gol pas 632 minutash në të tëra aktivitetet. Lojtarët e Atletikos e patën nxjerrë topin për herë të fundit nga porta e tyre më 9 prill, kur fitonin 1-3 ndaj Espanjolit në transfertë, një ndeshje e vlefshme për kampionatin spanjoll.
Skuadra e Madridit është në finale për herë të dytë në tre vite, e vendosur këtë herë që ta bëjë të vetin për herë të parë trofeun e Champions League-s. Dhe në finale mund të ketë sërish përballë Realin, diçka që do të mësohet këtë mbrëmje.
Guardiola do ta lërë ekipin që e drejtoi për tre vite pa mundur të përmbushë objektivin kryesor, fitimin e Champions League-s. E në të tre vitet është mposhtur në gjysmëfinale nga ekipet spanjolle, nga Reali, Barcelona e Atletiko.
Atletiko e Madridit ka shkruar emrin në finale. O tani, o kurrë, për të. /tesheshi.com/
