Është gjetur më në fund trupi i shqiptarit Petro Koleci, 29 vjeç, zhdukur mëngjesin e të mërkurës në lagjen periferike të Athinës, Mandra, aty ku u shënua dhe katastrofa më e madhe prej vërshimeve të ujrave.
Por edhe pse nuk bëhet fjalë për viktima të tjera në radhët e emigrantëve shqiptarë, shumë familje nga këta të fundit kanë humbur pothuajse gjithçka nga puna e mundi disavjeçar në Greqi.
Top Channel ishte në një prej familjeve të dëmutuara, ku e zonja e shtëpisë, përveçse qante nga ajo çfarë i kishte ndodhur, ankohej se autoritetet greke po silleshin si racistë.
“Ndihmë duam nga shteti ynë, sepse këta nuk interesohen fare për neve. Këta janë racistë, nuk na japin as çizme të veshim. Hyni brenda, por unë nuk kam se me çfarë të ha bukë sot. Askush nuk do t’ia dijë”, u shpreh mes ngashërimeve Violeta Bono. /tesheshi.com/
