Ministria e Jashtme e Greqisë ka publikuar një foto në lidhje me takimin e Ministrit të Jashtëm, Nikos Kotzias, ku theksohet se është zhvilluar me përfaqësues të minoritetit grek në Shqipëri.
Në foton e mësipërme, në mënyrë të çuditshme mungojnë personazhet kryesorë të deritanishme të minoritetit grek në Shqipëri, përkatësisht krerët e PBDNJ-së dhe shoqatës OMONIA; Vangjel Dule dhe Vasil Bollano.
Siç shikohet, përfaqësues të minoritetit grek janë cilësuar dy eksponentë të rëndësishëm të dy forcave të tjera politike, të cilët realisht kanë kombësi greke.
Ata janë: ish-ministri i Punës dhe Çështjeve Sociale, Spiro Ksera, përfaqësues i strukturave të larta të Partisë Demokratike si dhe Vangjel tavo, ish-ministër dhe deputet i Lëvizjes Socialiste për Integrim dhe njëkohësisht drejtues për qarkun e Gjirokastrës.
Ministria e Jashtme e Greqisë nuk ka dhënë asnjë koment në lidhje me takimin, por vetë publikimi i fotos ku mungojnë Dule e Bollano është një tregues i rëndësishëm i rënies së “yllit” të tyre politik.
Ky zhvillim ka padyshim arsyet e veta, ku dy duket se janë më rilevantet: rënia e peshës elektorale e PBDNJ-së në jug të vendit dhe afrimi i çiftit Dule-Bollano me eksponentë të grupit ekstremist grek “Agimi i Artë”.
Në zgjedhjet e fundit lokale të 21 qershorit, komunën e Dropullit e ka fituar Partia Demokratike, përfaqësues i së cilës në zonat minoritare është ish-deputeti dhe ish-ministri Spiro Ksera. Kurse LSI ka dalë forcë e parë në qarkun Gjirokastër, ku deputeti Vangjel Tavo, një politikan me kombësi greke është drejtues i saj.
Situata e brendshme në Greqi dhe evoluimi i zhvillimeve kanë sjellë edhe një riformatim të përfaqësimit që kanë detyruar Athinën të përdorë një lëvizje tjetër; jo interlokutimin nëpërmjet partisë etnike të minoritetit por nga minoritarët në partitë e mëdha, të cilat me rezultatet në jug janë kthyer në qendra të rëndësishme pushteti. Bashkia e Dropullit për shembull përfshin një territor të rëndësishëm që administron jo vetëm fshatra ku banojnë minoritarë por edhe territore të tjera si Labova ku banojnë shqiptarë etnikë. /tesheshi.com/
