PRONONCIMI/ Atentati “i pamundur”, Suad Lici: jeta vazhdon, s’i trembem askujt

Suad Lici, shënjestër e një atentati të dështuar ndaj tij, falë symprehtësisë për të dalluar një sasi tritoli poshtë automjetit, foli për mediat duke thënë se ai nuk ka problem me askënd.

Administrator i Vllaznisë, ai druhet të thotë se atentati ndaj mund të ketë lidhje dhe me këtë detyrë.

Rreth orës 08:30 dola nga shtëpia pashë një pako të dyshimtë, lajmërova policinë dhe kaq.

Keni pasur konflikte apo presione?
Absolutisht, nuk kam asnjë konflikt me asnjë njeri.

 Lidhet kjo ndoshta me detyrën tuaj te Vllaznia?

Po, ndoshta me detyrën, nuk e di, le t’ia lëmë organeve kompetente. Unë nuk kam konflikte me asnjë njeri, jam njeri i lirë dhe do të vijoj që të jem njeri i lirë.

Keni pasur kërcënime, presione apo mesazhe, pasi nga burimet që kemi e dimë që keni pasur, por nuk e di nëse i keni denoncuar?

Jo, nuk kam pasur asnjë lloj problematike, kanë kërkuar njerëzit sqarime i kam sqaruar dhe kaq

Për cfarë?

Në lidhje me sportin. Se nuk kam asnjë problematikë tjetër

Dyshoni se lidhet me aktivitetin e lojtarëve te Vllaznia?

Nuk jam unë. Unë jam për mbarëvajtjen e punës. Formacionin e bën stafi teknik me drejtorin teknik, cdo gjë është bërë në bazë të strukturës te Vllaznia. Unë kam qenë i detyruar me plotësuar kërkesat e drejtuesve të klubit.

A është presion për t’u larguar nga Vllaznia, ju tremb?

Jo! Absolutisht! Do të vijoj që të bëj detyrën edhe sot do të jem në Durrës për ndeshjen në orën 17:00. Do të vijoj detyrën

Keni një apel për drejtësinë?

Unë mendoj që pa folur organet nuk kemi pse i vendosim një etiketë. Nëse është në marrëdhënie me sportin, mendoj që njerëzit kriminelët duhet të rrinë larg sportit, ta lënë qytetin e Shkodrës të bëjë sportin, jetën e vet sportive, se ky qytet ka nevojë për shumë gjëra.

Ju tremb kjo ngjarje?

Absolutisht jo! Do të vijoj jetën time të përditshme, aktivitetin privat të familjes sime, nuk më tremb asnjë fije, në Shkodër dhe në Tiranë më kanë përditë.

Çfarë do të thotë kjo?

Jam njeri i lirë edhe pas kësaj ngjarje

Duhet theksuar se Suad Lici, paçka “të njëjtit mbiemër” me fisin e njohur në Shkodër, anëtarë të së cilës kanë qenë vitet e fundit në shënjestër të disa atentateve, nuk ka asnjë lidhje me ta dhe gëzon integritet si figurë publike në Shkodër. /tesheshi.com/