Analisti i njohur kosovar Milazim Krasniqi nuk beson te sekreti i dalë sipas së cilit ka patur një plan për t’i bërë atentat Albin Kurtit.
“Rasti i Kosovës, nëse e marrim të mirëqenë, kemi dy kundërshtarë politike dhe profile të ndryshme, Albin Kurti dhe Xhavit Haliti ndaj nuk kuptoj si mund të jetë një sulm ndaj dy njerëzve që s’i lidh asgjë.
Mund të jetë edhe një lojë e shërbimeve, mund të jetë edhe pjesë e presioneve që po bëhen ndaj qeverisë Kurti në këtë pikë të dialogut. Fakti që objekt i njëjtë sulmi është edhe Xhavit Haliti që sot nuk ka asnjë peshë vendimmarrëse në politikë të bën të dyshosh”, tha Krasniqi në Euronews Albania.
Megjithatë, vetë Kurti duket se beson versionin se kanë dashur të vrasin.
“Personi për të cilin dyshohet se do kryente atentatin ndaj Kurtit, është Prek Kodra, i cili sipas të dhënave në raport, thuhej se aftësi të mira në përdorimin e snajperëve.
Njësia Kundër Terrorizmit në Kosovë ka marrë informacione për atentat edhe ndaj Ismet Haxhës, ish-anëtar i Shërbimit Informativ të Kosovës dhe Xhavit Halitit, anëtar i Partisë Demokratike të Kosovës dhe ish-deputet.
Objektivi i parë do të ishte Ismet Haxha. Objektivi i dytë ishte Xhavit Haliti, i cili do të vritej një muaj pas Haxhës për t’u dukur si hakmarrje. Më pas, do të vritej edhe kryeministri Albin Kurti.
Vrasjet do të kryheshin me qëllim destabilizimin e Kosovës”, thuhet nga kabineti i kryeministrit kosovar. /tesheshi.com/
