Të gjitha agjencitë botërore të lajmeve e kanë përcjellë mbrëmë njoftimin për vendosjen e Kosovës në grupin I të kualifikueseve europiane për në Kupën e Botës të vitit 2018.
Një prej tyre, Associated Press, e ka dhënë kështu lajmin:
“UEFA e ka vendosur Kosovën në grupin I të kualifikueseve për Kupën e Botës pasi vendosi se anëtari i saj më i ri nuk mund të luajë kundër Bosnjë-Hercegovinës për arsye sigurie.
Organi qeverisës i futbollit europian thotë se Kosova duhet të shkojë në grupin fillimisht me pesë ekipe në short, që përfshin Kroacinë, Ukrainën, Islandën, Turqinë dhe Finlandën.
Kosova dhe Gjibraltari u pranuan si anëtarë të FIFA-s muajin e shkuar, dhe duhej t’u gjendej vendi në programin kualifikues të Kupës së Botës që nis në shtator.
Gjibraltari do t’u bashkohet pesë ekipeve të tjera në grupin H, Bosnjë-Hercegovinës, Belgjikës, Greqisë, Qipros dhe Estonisë.
Të nëntë grupet kualifikuese europiane kanë tani nga gjashtë skuadra.
UEFA pohoi se paneli i saj i emergjencës vendosi që ekipet serbe nuk do të luajnë gjithashtu ndaj ekipeve nga Kosova në aktivitetet e ardhshme.
Serbia nuk e njeh shtetësinë e Kosovës, ish-provincës së saj që shpalli pavarësinë në vitin 2008.” /tesheshi.com/
