Presidenti sirian, Bashar al Assad u zotua të fitojë luftën e zgjatur në vendin e tij, ndërsa pranoi se trupat qeveritare kanë vështirësi të mbajnë nën kontroll territorin e përballen me mungesë rekrutësh.
Në një fjalim televiziv të dielën, përpara zyrtarëve lokalë në Damask, presidenti u përpoq të justifikonte zmbrapsjen nga disa zona të Sirisë, mes të cilave edhe qytetin verilindor të Idlibit. Ai tha se këto janë lëvizje të prioritetit ushtarak.
“Ishte e nevojshme të specifikonim zonat kritike për forcat tona të armatosura ku duhet të përqëndroheshim. Shqetësimi për ushtarët tanë na detyroi të largoheshim nga disa zona”, tha ai.
Ushtria siriane ka pasur dikur rreth 300 mijë pjesëtarë, por është reduktuar dukshëm për shkak të vrasjeve, dezertimeve dhe mungesës së rekrutimeve të reja.
“Kemi mungesa në burime njerëzore në ushtri”, pranoi Assad.
Megjithatë, ai tha se kjo nuk do të thotë kolaps, pasi Forcat e Armatosura janë në gjendje të mbrojnë mëmëdheun./tesheshi/
