Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell, tha në Bruksel, liderët e Kosovës dhe Serbisë nuk arritën një marrëveshje që do të zgjidhte krizën aktuale, por se dialogu vazhdon.
Në një deklaratë për media, pas dy raundeve të takimeve të veçanta dypalëshe dhe dy raundeve të takimeve trepalëshe të BE-së me kryeministrin e Kosovës, Albin Kurti dhe presidentin e Serbisë, Aleksandar Vuçiç, Borrell tha se ky ishte një takim për menaxhimin e krizës, me qëllim qetësimin e situatës në terren pas tensioneve në veri të Kosovës për shkak të targave dhe dokumenteve për hyrje dhe dalje të qytetarëve ndërmjet Kosovës dhe Serbisë.
“Fatkeqësisht, në takimin e sotëm nuk kemi arritur ende një marrëveshje, por kjo nuk është fundi i historisë dhe liderët ranë dakord që procesi të vazhdojë. Do të ketë sërish bisedime në ditët në vijim sepse ka ende kohë deri më 1 shtator”, tha kreu i diplomacisë europiane.
Borrell theksoi se procesi i gjetjes së një zgjidhjeje të pranueshme për të dyja palët do të vazhdojë.
“Ka qenë një ditë e gjatë, por ne do të vazhdojmë me këtë proces të ndjeshëm politik për të gjetur një zgjidhje të pranueshme nga të dyja palët për të siguruar stabilitet dhe paqe së pari për qytetarët, por edhe për të gjithë Evropën”, tha Borrell.
Ai ka thënë se bashkësia ndërkombëtare nuk dëshiron të ketë më tensione në veri të Kosovës dhe ka theksuar se palët do të jenë përgjegjëse për çdo përshkallëzim në terren.
Ai po ashtu tha se BE-ja po punon për arritjen e një marrëveshjeje përfundimtare gjithëpërfshirëse për normalizimin e marrëdhënieve ndërmjet Kosovës dhe Serbisë, edhe pse ka dallime mes palëve se si duhet të jetë kjo marrëveshje.
Në dialogun e Brukselit në nivelin më të lartë politik mori pjesë edhe përfaqësuesi special i BE-së për dialogun ndërmjet Beogradit dhe Prishtinës, Miroslav Lajçak, ndërsa në margjinat e takimit ishte edhe përfaqësuesi special amerikan, Gabriel Escobar.
Sekretari i Përgjithshëm i NATO-s, Jens Stoltenberg, para takimit është takuar veçmas me Kurtin dhe Vuçiçin të mërkurën në Bruksel, duke thënë se KFOR-i është i gatshëm të reagojë nëse e kërkon situata në veri të Kosovës.
Ai inkurajoi të gjitha palët që të shmangin çdo retorikë urrejtjeje dhe të zgjidhin të gjitha çështjet e pazgjidhura përmes dialogut. Stoltenberg kujtoi gjithashtu se KFOR-i ka më shumë se 3700 trupa në Kosovë dhe se është plotësisht i përkushtuar në mandatin e tij sipas Rezolutës 1244 të Këshillit të Sigurimit të Kombeve të Bashkuara. /tesheshi.com/
