Orët e para të kësaj të mërkure kanë sjellë votimin në Asamblenë Kombëtare të Francës për ta shtyrë sërish gjendjen e jashtëzakonshme në vend.
Masat e jashtëzakonshme të sigurisë qenë planifikuar të merrnin fund në mbarim të korrikut, por akti i përgjakshëm i Nicës ka sjellë shtyrjen e tyre.
Gjendja e jashtëzakonshme është në fuqi në Francë që në nëntorin e një viti më parë, pas sulmeve të Parisit, për të qëndruar tani më së paku deri në fund të janarit të 2017-tës.
Eshtë hera e katërt që parlamenti francez propozon shtyrjen e gjendjes së jashtëzakonshme, por vendimi tani kërkohet të miratohet dhe nga Senati.
Nën gjendjen e jashtëzakonshme, policia ka më tepër fuqi për të kryer kërkime dhe për të vendosur njerëz nën arrest shtëpiak.
Kryeministri francez, Manuel Valls, nënvizoi gjatë debatit në Asamblenë Kombëtare se vendi duhet të mësojë të jetojë me kërcënimin. /tesheshi.com/
