Kryeministri Edi Rama deklaroi nga Asambleja Kombëtare e partisë Socialiste se zgjedhjet e 18 Qershorit nuk do të shtyhen, ndërsa ftoi LSI-në të ndajë mendjen dhe të vendosë për bashkëqeverisjen pas zgjedhjeve. Rama tha se pa diskutim që ky koalicion është më i pëlqyeshmi, ndërsa i takon LSI të vendosë për 4 vitet e ardhshme.
“Zgjedhësit shqiptar në 18 qershor do të marrin një vendim me pasoja afatgjatë. Ata do të vendosin nëse do të bëjnë shtet apo do të lëngojnë në batakun e drejtësisë?! Kemi marrë reforma që në 25 vjet askush nuk e mori mundimin. E kemi bërë falë një aleancë që ka pasur mbi 84 vota. Këto janë më të rëndësishme sesa dallimet. Vizioni dhe interesi strategjik i PS në këtë moment kyç imponon thellimin për të fuqizuar shtetin, për ta bërë Shqipërinë Europiane realitet, ne as e kemi diskuaruat dhe as e diskutojmë deri në çastin e fundit koalicionin ku jemi si opsionin tonë më të pëlqyer”, theksoi kryeministri.
Sipas Ramës, partneriteti me LSI-në matet nga reformat. “Partneritetin me LSI ka ndër ne që e përjetojnë si martesë të ezauruar, si një bashkëjetesë rraskapitëse, ka të tjerë akoma që e përjetojnë si mëkat politik”, theksoi ai, duke shtuar se arsyet janë nga më të ndryshmet, herë të drejta dhe herë të padrejta. “Sa për mua cilësia e këtij partneriteti nuk matet më gjërat që nuk shkojnë në bashkëqeverisjen e sotme , as me sasinë e helmit që hera heres hedhin partnerët e vegjel në ujin e bashkëqeverisjes , por matet me sa shumë reforma kemi kaluar sëbashku për të bërë shtet. Matet me faktin se nga fillimi i kësaj qeverisje dhe deri tani figurojnë 210 mijë njerëz në punë, jo në sektorin bujqësor dhe nuk matet sa ministra të LSI mungojnë në Parlament.
Matet me volumin e punës që kemi bërë sëbashku në qeveri në çeljen e dritës jeshile në parlamentin në rrugën tonë për të bërë shtet dhe nuk matet me llafet dhe thashethemet të kooridoreve. Shqipëria që ne kemi në zemër as nuk lidhet dhe as nuk varet nga humoret, por varet vetëm me përmasën e dashurisë dhe pasionin për atdheun e fëmijëve tanë”, tha Rama.
Kryeministri ftoi Opozitën të hyjë në zgjedhje, duke lënë çadrën, edhe pse sipas tij, më 18 qershor zgjedhjet janë të popullit. /tesheshi.com/
