Parizienët nuk gjejnë kundërshtar të denjë në kampionatin francez, ndërsa ia dolën të fitojnë këtë fundjavë dhe në takimin më klasik, në atë ndaj Olimpikut të Marsejës.
Dueli nisi mirë për miqtë nga kryeqyteti, që e gjetën që në minutën e dytë rrugën e rrjetës, pas golit të shënuar nga Ibrahimovic.
Vendasit do të ushtronin më pas presion, dhe do ta barazonin rezultatin teksa në minutën e 25-të shënoi për ta Remy Cabella. Pjesa e parë e lojës do të mbyllej në barazim, me një epërsi të lehtë të Marsejës.
Paris Sent-Zhërmeni do ta rikthente avantazhin 19 minuta para mbarimit të tërë lojës, me golashënues këtë herë argjentinasin Angel di Maria. Më tutje nuk do të kishte më ndryshim rezultati, me shifrat të mbërthyera në 1-2.
PSG-ja vijon të ketë një dominim të plotë të kampionatit francez. 22 fitore dhe tre barazime për të në 25 javë, kurse humbja e parë nuk duket ende në horizont. 69 pikët në krye të klasifikimit nuk lënë thuajse asnjë fije dyshimi për kampionët e ardhshëm, ndërsa Monakoja e vendit të dytë ka plot 24 pikë më pak.
Pas fillimit të vrullshëm sezonin e shkuar, Olimpiku i Marsejës do të pësonte një rënie të shpejtë, gjë e cila reflektohet dhe në këtë kampionat. Marseja gjendet aktualisht në vend të dhjetë, në mesin e artë të renditjes, si një skuadër pa pretendime. /tesheshi.com/
