Nga Entela Canaj
Janë të shumtë artistët shqiptarë (piktorë, aktorë, këngëtarë), por dhe sportistë, që pas shumë vitesh karrierë vendosën të braktisin profesionin e tyre për t`u marrë me politikë, por që dhe janë marrë paralel me të duke vazhduar aktivitetet respektive. Një pjesë patën sukses, një pjesë dështuan, e një pjesë u penduan dhe iu rikthyen profesionit të vjetër. Ja kush janë disa prej tyre:
Edi Rama- Ndoshta artisti më i sukseshëm në politikë mund të konsiderohet vetë kryeministri Rama, i cili ‘dashurinë’ e tij të parë ka pikturën; por prej 20 vitesh i është dedikuar vetëm politikës, duke prekur edhe majat e saj, të qënit kryeministër i vendit. Megjithatë pasioni dhe talenti i tij në art nuk është shuar as tani, përkundrazi tregohet me mjaft elegancë në mënyrën se si e ka arreduar Kryeministrinë, e mjaft godina të tjera qeveritare që i janë nënshtruar rikonstruksionit. Po ashtu, Rama mund të konsiderihet dhe si ish-sportist, pasi ka luajtur disa vite basketboll me Dinamon, aty nga fundi i viteve `80.
Rajmonda Bulku– Një ndër aktoret më të bukura dhe më të talentuara shqiptare, vendosi t`i futej poltikës pak vite më parë, në një moshë që e kishte konsumuar disi karrierën e saj si aktore. Ajo u bë depuetet e opozitës në legjislaturën 2009-2013, por më pas nuk u pa të garonte sërish në lista. Për sa qe deputete, u përpoq të ishte sa ma aktive. Riskoi shumë nga statura e një aktoreje, pasi politika e trazuar, edhe në fjalor, nuk e kurseu disa herë nga shpotitjet.
Luiza Xhuvani- Një tjetër aktore e mirënjohur e teatrit dhe kinemasë shqiptare iu fut politikës njëkohësisht me kolegen e saj Bulku, ndonëse në partinë rivale, PS. Ajo u zgjodh deputete e së majtës në dy legjislatura, ndërsa vendosi të jap dorëheqjen nga mandati i dytë një vit më pare, pasi i biri vrau katër persona gjatë një sherri në një lokal nate. Tashmë i është përkushtuar vetëm skenës teatrale.
Rosela Gjylbegu- Këngëtarja simpatike nga Shkodra, zbulimi i edicionit të parë të ‘Etheve’, krahas këngës, nisi të punonte pranë Kryesisë së Kuvendit, si pjesë e stafit të ish-kryetares Jozefina Topalli, ndërkohë që vijon ende aktualisht të punojë aty, por pa hequr dorë nga kënga. Rosela vazhdon ta mbajë gjallë pasionin e saj për këngën, ndërsa është parë shpesh të marrë pjesë nëpër festivale të ndryshme, ku është vlerësuar edhe me çmime.
Eneida Tarifa- Këngëtare e talentuar, dhe kohët e fundit edhe prezantuese e disa spektakleve më të ndjekura në Shqipëri, ka qenë pjesë e Këshillit Bashkiak të Tiranës në radhët e LSI. Por angazhimi i saj në politikë nuk qe më i gjatë se një mandat, pasi ajo iu kthye sërish pasionit të saj për këngën dhe prezantimin.
Bojken Lako-këngëtar dhe kantautor, edhe Boku, siç e thërrasin ndryshe, ka qenë pjesë e Këshillit Bashkiak të Tiranës, në radhët e PD-së, në kohën kur Bashkia drejtohej nga Lulzim Basha (2011-2015). Veç kësaj, largimi i tij nga Top Media, aty ku punoi për shumë vite duke qenë dhe nga të parët pjesë e stafit që me Top Albania Radio, ka si shkak qëndrimet politike. Vite më parë, edhe i ati, aktori i njohur Bujar Lako, kandidoi për kreun e një njësie bashkiake në Tiranë nën siglën e PD-së, kohë kur rikandidonte Edi Rama.
Indrit Fortuzi-ish-futbollist i “Tiranës”, “zogu” siç i thonin ndryshe, vendosi të kandidojë në garën për kryetar minibashkie të Tiranës në vitin 2011 dhe fitoi. Ai u bashkua me PD-në dhe qëndroi për 4 vjet kryetar i minibashkisë 9-të në Tiranë. Sportistë të tjerë që kanë qenë pjesë e këshillit bashkiak të Tiranës në radhët e PD, janë edhe Klodiana Shala dhe Sulejman Mema.
Zef Bushati – “Agushi” tek “Njeriu me Top”, tashmë nuk është më pjesë e politikës dhe as e artit. Në vitin 1975 mbaron studimet e larta në Akademinë e Arteve, ku diplomohet aktor e regjisor. Në dhjetor të po këtij viti, Zef Bushati kapërcen dyert e Teatrit Kombëtar si aktor. Për një periudhë 15-vjeçare Zef Bushati interpretoi në rreth 35 role. Pas vitit 1991 angazhohet në politikë, në fillim N/kryetar i Partisë Republikane, e më pas Kryetar i Partisë Demokristiane duke kulmuar në karrierë me postin e ambasadorit të Shqipërisë në Vatikan.
Suzana Turku- Figurë e shquar e muzikologjisë sonë, dirigjentja e parë shqiptare e cila me korin “Pax Dei” sjell me mjeshtëri tingujt e paqes e të artit shqiptar e botëror në skenat tona . Ajo ka qenë për një kohë të gjatë zv.ministre e Kulturës duke dhënë një kontribut të veçantë në politikat e ndërmara për artin në Shqipëri.
Luis Ejlli- Këngeatri simpatik nga Shkodra që po ashtu fitoi në një nga edicionet e ‘Etheve’. Gjatë kohës së qeverisjes së PD-së, emri i tij lakohej si simbol i nepotizimit në politikë e diplomaci. Dhëndër i Jozefina Topallit, ai përfundoi si sekretar i Parë për Kulturën dhe Turizmin në Ambasadën Shqiptare në Paris, një post në fakt që nuk përputhej aspak me staturën e tij. Prej vitesh nuk është parë më të interpretojë.
Fate Velaj- Piktor vlonjat që e ndërtoi karrierën e tij në Austri, ka pak vite që është kthyer në atdhe për të pranuar postin e ofruar nga kryeministri Rama si Këshilltari i Kryeministrit për Diplomacinë Kulturore dhe Rilindjen Europiane. Fate Velaj njihet për pikturat e tij të veçanta, dhe angazhimin në dhjetra ekspozita e bienale në Vjenë e vende të ndryshme të botës, ku është nderuar dhe me mjaft çmime. Emri i tij u bë më shumë i njohur ndër shqiptarë, pas miqësisë me Ramën dhe investimit të tij personal për ta përfshirë në sallonet e kulturës, politikës dhe diplomacisë vjeneze gjatë viteve të sikletshme në opozitë.
Çiljeta Xhilaga- Këngëtare dhe aktore, më tepër populiste sesa profesinoniste, produkt tipik i turbofolkut si rrymë dhe si mendësi artistike, Çiljeta Xhilaga përveçse u angazhua si këngëtare në fushatat elektorale të Partisë Demokratike, u bë edhe anëtare në Këshillin e PD, me shpresën se do të ‘shpërblehej’ me një post në të ardhmen. Ajo mban edhe një diplomë në Shkencat Politike. Por gjërat ndryshuan si në parti dhe në jetën e Çiljetës, ndaj dhe sot këngtarja është shkëputur nga politika.
Greta Koçi – Së bashku me motrën e saj, këngëtaren Eni Koçi, u bën pjesë e Forumit Rinor të Partisë Demokratike dhe u panë mjaft të angazhuara në kohë fushate. Por ashtu si kolegja e tyre, Xhilaga, asnjëra prej tyre nuk mori ndonjë post me rëndësi në strukturat e PD-së. Më përpara eci Greta, pasi u emërua si këshilltare pranë ministrit të Rendit, gjatë kohës kur qeveriste Partia Demokratike. /tesheshi.com/
