Mësohet arsyeja e vizitës së papritur në Kosovë e kryeministrit shqiptar Edi Rama. Tirana dhe Prishtina do të dorëzojnë në Konferencën e Vjenës një projekt të përbashkët për të ndërtuar një termocentral dhe hidtrocentral, të cilë do të rrisnin fuqinë prodhuese dhe përfundimisht do të hiqte varësinë nga importi i energjisë elektrike. Ndërkaq, Tirana dhe Prishtina së bashku do të paraqesin një projekt tjetër për rrugën e re që do të lidhë Kosovën me autostradën Adriatiko Joniane e cila pritet të marrë financimin nga Gjermania. Siç mësohet, bëhet fjalë për rrugën që lidh Kosovën me autostradën e re Podgoricë-Plavë-Hani i Hotit, e cila kalon nëpërmjet kufirit shqiptar për të shkuar në kryeqytetin malazez. Kjo autostradë do të jetë një ndihmesë e madhe për zonën e Rrafshit të Dukagjinit, një trevë e pasur dhe me mjaft zhvillim ekonomik.
Kryeministri shqiptar, Edi Rama ka mbërritur për vizitë zyrtare në Kosovë, i pritur në Prishtinë, para Kryeministrisë nga kryeministri kosovar Isa Mustafa e zv/kryeministri i parë e ministri i Jashtëm, Hashim Thaçi.
Rama dhe Mustafa, me disa nga anëtarët e dy qeverive, ku është edhe ministri i Jashtëm shqiptar, Ditmir Bushati, kanë zhvilluar një takim pa praninë e mediave.
Endri Fuga, drejtor i Zyrës së Komunikimit në Kryeministrinë shqiptare, përmes një postimi në Twitter thotë se, qëllimi i kësaj vizite lidhet me “Koordinimin e projekteve dhe qëndrimeve të dy shteteve në prag të samitit të Vjenës dhe zhvillimet në rajon”.
Rrugëtimi i Ramës vjen vetëm pak ditë pasi në Tiranë ndaloi kancelarja gjermane Angela Merkel, një ndër temat e diskutimeve mes saj dhe kreut të ekzekutivit shqiptar ishte edhe Kosova. Për herë të fundit, kryeministri Rama ka qenë në Prishtinë në muajin maj, kur u përurua monumenti i Ismail Qemalit.
/tesheshi.com/
