Në një moment kur në Kuvend po vihej në provë mazhoranca qeverisëse, aleati kryesor në qeverisje Ilir Meta, i cili është dhe kryetar i Kuvendit, nuk ishte i pranishëm në sallë.
Deputetët e partisë së tij ishin të pranishëm dhe votuan për ministrat e rinj socialistë duke mos krijuar një krizë në qeverisje, pavarësisht divergjencave, por Meta gjeti një arsye që të mos votonte vetë.
Ndoshta do të duhej të kishte menduar të gjente një shkak më bindës për këtë mungesë pasi dukej se arsyeja ishte ose ‘ironike” për aleatin e tij Edi Rama ose e rastësishme vetëm si pretekst për të mos qenë në Kuvend.
Ai ishte një një konferencë për mjekët veterinerë ku foli për vaksinimin e lopëve.
“Vitet që shkoi shërbimi veterinar përballi me sukses sëmundjen e rrezikshme dhe të panjohur më parë të ‘Dermatozës Modulare’, duke frenuar me sukses përhapjen dhe pasojat e saj. Dhe tashmë Ministria e Bujqësisë po kompenson kokë për kokë me lopë race, me prodhimtari dyfish më të lartë të gjithë fermerët e dëmtuar fatkeqësish nga kjo sëmundje. Falë angazhimit dhe përkushtimit të trupës veterinare u vaksinuan rreth 250 mijë lopë dhe u krijua një brez parandalues i qëndrueshëm”, – tha Kryetari i Kuvendit sipas njoftimit për shtyp të zyrës së tij. /tesheshi.com/
